Նեմրա խումբը շուրջ տասներեք տարի է՝ իր երաժշտությամբ ձևավորում է հայկական ռոքի նոր հնչողությունը։ Խմբի մենակատար Վան Եղիազարյանը հիշում է այն օրերը, երբ ամեն ինչ նոր էր․ առաջին երգի ձայնագրությունը, առաջին ալբոմը, առաջին փորձերը։
«Երբ ձայնագրում էինք առաջին ալբոմի առաջին երգը, կարելի է ասել՝ ամեն ինչ նոր էր։ Ամենադժվար երևույթը ինձ համար երգելն էր։ Մեծ բարդություններ կային, բայց պատասխանատվությունն էր քիչ», - ասում է Վանը:
Այժմ Նեմրան ունի երեք ալբոմ։ Վերջին՝ երրորդ ալբոմը թողարկվել է այս տարվա հունիսի 11-ին և ներառում է 11 նոր երգ։
«Երրորդ ալբոմի ստեղծման ժամանակ պատասխանատվությունը շեշտակի աճել էր։ Պետք էր անել ավելի լավը, քան նախորդ երկու ալբոմները», — նշում է մենակատարը։
Ալբոմի շնորհանդեսը դարձավ խմբի ստեղծագործական կյանքի առանձնահատուկ իրադարձություններից մեկը։ Այն անցկացվեց Կ. Դեմիրճյանի անվան մարզահամերգային համալիրում՝ «Նեմրա մոլորակի» խորհրդանշական ձևաչափով։ Վանի խոսքով՝ այդ բեմ դուրս գալը երբեք ինքնանպատակ չի եղել․
«Միշտ մտածել էինք համալիրում նվագելու մասին։ Բայց որ ասեմ՝ ինքնանպատակ էր, երբեք այդպես չի եղել։ Շատ բան բացահայտվեց մեզ համար։ Հասկացանք, որ մեր լսարանը մեր կողքին է։ Շատ մեծ ինքնավստահություն ունեցանք, որովհետև ինչքան էլ բացօթյա համերգներին տեսնում ենք հարյուրավոր կամ հազարավոր մարդկանց, փակ տարածքում՝ տոմսերով, այդքան մարդ տեսնելն ուրիշ պատմություն է։ Դա մեզ համար մեծ գնահատական էր»։
Նեմրայի լսարանը ժամանակի ընթացքում փոփոխվում է, սակայն խմբի երկրպագուները շարունակում են անգիր երգել բոլոր ստեղծագործությունները։ Նոր ալբոմի շնորհանդեսի ընթացքում հանդիսատեսը նույն ոգևորությամբ երգում էր նույնիսկ այն երգերը, որոնք թողարկվել էին հենց այդ նույն օրը առավոտյան:
«Նախկինում էլ նման դեպքեր եղել են, բայց այս անգամ սպասելիքները գերազանցվեցին։ Առաջ տալիս էինք մեկ երգ, ու տասը օր հետո մարդիկ արդեն անգիր էին երգում։ Իսկ հիմա՝ նոր երգերը թողարկելու նույն օրը, ամբողջ դահլիճը մեզ հետ երգում էր. դա ուղղակի շշմեցուցիչ էր մեզ համար»-, նշում է Վանը:
Խումբը վերջին տարիներին նաև ընդլայնում է իր միջազգային սահմանները։ Նեմրան այս տարի համագործակցեց աշխարհահռչակ երաժիշտ Սերժ Թանկյանի հետ։ Ինչպես պատմում է Վանը՝ նրանք Սերժին են ուղարկել երրորդ ալբոմի երգացանկը, և հենց նա է ընտրել «I’m Afraid of Stars» երգը՝ այն կատարելու համար։
Բացի այդ, Նեմրան հանդես է եկել Զեմֆիրայի համերգին՝ ներկայացնելով իր երգերը և արժանանալով ջերմ ընդունելության ոչ միայն հայ, այլև արտասահմանյան հանդիսատեսի կողմից։ Համերգային ծրագրերը չեն սահմանափակվել Հայաստանյան բեմերում. բենդը ելույթներ է ունեցել ԱՄՆ-ում, Կանադայում, Լիբանանում և այլ երկրներում ` մի տանիքի տակ հավաքելով սփյուռքահայ և օտարերկրացի երկրպագուներին:
Նեմրան շարունակում է իր ստեղծագործական ուղին՝ կոտրելով կարծրատիպերը հայկական երաժշտության մասին։ Խումբը միավորում է ազգայինն ու ժամանակակիցը, ստեղծում սեփական հնչողությունը և շարունակում է ապացուցել, որ հայկական ռոքը կարող է հնչել համաշխարհային բեմերում։
