Երևանի պետական համալսարանի գրեթե բոլոր միջոցառումների և համերգների ժամանակ կարելի է տեսնել մի խումբ երիտասարդների, որոնք իրենց երաժշտությամբ լցնում են համալսարանը։ Նրանք ուսանողներ են տարբեր ֆակուլտետներից, որոնք միավորվել են երաժշտական մեկ գաղափարի` YSU band-ի շուրջ։
Բենդը ստեղծվել է 10 տարի առաջ ԵՊՀ-ի՝ Շառլ Ազնավուրի անվան մշակույթի կենտրոնում` նախկին տնօրեն Կարինե Դավթյանի ղեկավարությամբ։ Վերջին 4 տարիների ընթացքում բենդը ղեկավարում է երաժիշտ, երգահան Արթուր Հակոբյանը։ Նրա խոսքերով՝ բենդի ղեկավար դառնալը ինքնաբերաբար է ստացվել:
«Կարինե Դավթյանն էր,որ ինձ առաջարկեց գալ այստեղ։ Այդ տարիներին ես «Երգ-երգոցն» էի ղեկավարում Հանրայինում և ժամանակ չունեի։ Ես միշտ հրաժարվում էի, չնայած բենդին օգնում էի գործիքավորման, ձայնագրությունների հարցում։ Հետո՝ երբ դուրս եկա «Երգ-երգոցից», և նորից առաջարկ ստացա, ասացի. «Լավ,գալիս եմ»։ Նախ երիտասարդության հետ աշխատելն է լավ, քանի որ ես էլ եմ երիտասարդ մնում, իսկ հետո, ամեն դեպքում, սա իմ գործն է` երաժշտություն է», - պատմում է բենդի ղեկավարը։
Բենդի կազմը հաստատուն չէ. մշակույթի կենտրոնն ամեն տարի նոր քասթինգ է հայտարարում, և բենդը համալրվում է նոր անդամներով։ Իսկ այն անդամները, որոնք արդեն ավարտում են համալսարանը, դուրս են գալիս բենդից։ Արթուր Հակոբյանի խոսքով՝ այս հանգամանքը դժվարացնում է աշխատանքը բենդի հետ։
«Միակ խանգարող բանն այն է, որ ամեն 2 տարին մեկ խմբի կազմը փոփոխվում է։ Երեխաները ավարտում են համալսարանը, արդեն գնում են կյանք և, բնականաբար, էլ չեն գալիս։ Հետո նորերն են գալիս։ Այս տարի մեզ մոտ 8 կամ 10 նոր աղջիկներ և տղաներ են եկել, որոնց հետ մենք պետք է նորից զրոյից սկսենք, պարապենք, մինչև հասցնենք լավ մակարդակի։ Այս առումով աշխատանքը մեծ է, բայց մեր նպատակն այն չէ, որ այս երեխաներից մենք ստանանք պրոֆեսիոնալ խումբ։ Ամեն դեպքում նրանք համալսարանում են, և ամեն մեկը նպատակ ունի ձեռք բերել ավելի լուրջ մասնագիտություն, իսկ երաժշտությունը Հայաստանում դեռևս լուրջ չէ ընդունվում», - նշեց Արթուր Հակոբյանը։
Բենդի ներկայիս հիմնական կազմում են Դավիթ Հովհաննիսյանը (կիթառ և վոկալ), Ալեքսանդր Բարսամյանը (հարվածային գործիքներ), Էլենը Գալուստյանը և Լիզա Ստեփանյանը (ստեղնաշարային գործիքներ), Վրույր Ասատրյանը (կիթառ), Վանանե Բարսեղյանը (վոկալ և ստեղնաշարային գործիքներ) և այլք։
Բենդի կիթառահարը` Վրույրը, որը սովորում է ԻԿՄ ֆակուլտետում և արդեն երրորդ տարին է, ինչ նվագում է բենդում, նշում է, որ կիթառ նվագել սովորել է հենց բենդ գալուց հետո.
«Ես, ընդհանրապես, ջութակահար և դաշնակահար եմ։ Պարոն Արթուր Հակոբյանն է ինձ օգնել, որ ես կիթառ նվագել սովորեմ։ Բենդը ինձ հիմնականում սա է տվել երաժշտական առումով՝ չհաշված իմ ձեռք բերած ընկերներին»։
Փորձերը դասերի հետ համատեղելու մասին Վրույր Ասատրյանը ասաց։
«Շաբաթական երկու օր ենք փորձեր անում։ Ամեն փորձը 2,5-3 ժամ է տևում։ Դասերի հետ հիմնականում հասցնում ենք, բայց մեկ-մեկ՝ օրինակ՝ միջանկյալ քննություններից առաջ, կարող ենք փորձերը չեղարկել, քանի որ գրաֆիկը այդքան շատ ամրացված չէ։ Մեծ հաշվով բենդը դասերին ընդհանրապես չի խանգարում», - հավաստիացրեց Վրույրը։
Իսկ Վանանե Բարսեղյանը բենդում ավելի երկար է` արդեն չորրորդ տարին։ Բենդում երգում է և հարվածային գործիքներ է նվագում։ Բենդի մասին նա պատմում է հետևյալը.
«Առաջին հերթին՝ բենդը ինձ տվել է իմ շատ լավ ընկերներին։ Հետո ես այստեղ շատ մեծ փորձ եմ ստացել՝ պարոն Արթուր Հակոբյանի գլխավորությամբ։ Եթե նա չլիներ ինձ սովորեցնողը, ես սինթեզի վրա շատ բաներ չէի իմանա։ Շատ-շատ այլ նյուանսներ կան, որոնք հենց նա է ինձ սովորեցրել։ Ու ես հիմա նրա շնորհիվ կարող եմ նաև ուրիշ տեղեր նվագել և ավելի խորանալ երաժշտության մեջ արդեն ինքս ինձնով», - ասաց Վանանեն։
YSU band-ը ավելի շատ քավեր-խումբ է, այսինքն՝ նրանք չունեն հեղինակային երգեր, այլ կատարում են հայերեն և օտարալեզու հայտնի երգերը իրենց մշակմամբ և գործիքավորմամբ:
«Մենք ունենք շատ լավ ծրագիր` սկսած Սթիվի Ուանդերից, մինչև Pink Floyd, Queen և այլն։ Հիմա հայկական գործերն եմ ուզում շատացնել, որովհետև, ցավոք սրտի, այսօրվա ուսանողությունը այդքան էլ հայկականին մոտ չէ։ Իսկ հայերեն ո՞վ պետք է երգի, տանք` ուրիշնե՞րը երգեն։ Իմ մշտական կռիվը նրանց հետ դա է», - խոստովանեց Արթուր Հակոբյանը։
Իսկ արդեն հեղինակային երգերի մասին խմբի ղեկավարն ասաց, որ մինչև այս, հեղինակային երգերի բացակայությունը կապված էր փորձի պակասի հետ։ Արթուր Հակոբյանը նշեց, որ այս տարի պլաններ կան՝ հեղինակային երգեր ունենալու, քանի որ բենդն արդեն բավականին առաջ է գնացել և աճել է։ Բենդի ղեկավարի խոսքերով՝ հեղինակային երգեր ունենալը կնպաստի նրան, որ բենդը դիմագիծ ունենա և ավելի մեծ ճանաչում ստանա։
«Վերջերս մենք գնացինք ԵՊՀ-ի՝ Իջևանի մասնաճյուղ, որպեսզի այնտեղ ելույթ ունենաք։ Արձագանքը բավականին լավն էր։ Եվ մենք որոշեցինք այնպես անել,որ ամեն ամիս մշակույթի կենտրոնում համերգ տանք, որպեսզի ուսանողությունը իմանա, որ իրենք բենդ ունեն։ Մեզ համար շատ ցավալի է, երբ համերգների ժամանակ գալիս ենք և տեսնում, որ մի քանի մարդ է նստած», - նշեց Արթուր Հակոբյանը։
YSU Band-ի հաջորդ համերգի ամսաթիվը դեռ հայտնի չէ, բայց Արթուր Հակոբյանը ասաց, որ եթե որևէ միջոցառմանը մասնակցելու առաջարկ ստանան, սիրով կընդունեն։ Իսկ հիմա բենդն ակտիվ փորձեր է անում, որպեսզի լավ ներկայանա իր հետագա համերգներին։
