Սոցիալական ցանցերի արագ զարգացման հետ մեկտեղ ինֆլուենսերներն ու բլոգերները դարձել են ժամանակակից մեդիայի լիարժեք դերակատարներ՝ ձևավորելով հանրային կարծիք, վարքագիծ և մտածելակերպ: Ովքե՞ր են նրանք, ի՞նչ պատասխանատվություն ունեն և ուր են գնում՝ journalist.am-ը զրուցել է բլոգեր Օվսաննա Խաչատրյանի (Ovs) հետ:

-Ինչպե՞ս եք գնահատում ինֆլուենսերների դերը ՀՀ մեդիաշուկայում:

-Վերջին 2-3 տարիներին ինֆլուենսերների դերն էականորեն մեծացել է. նրանք արդեն կարծիք թելադրող ձայներ են: Հաշվի առնելով, որ հայ ինֆլուենսերների մեծ մասը պատասխանատու ու գրագետ կոնտենտ ստեղծողներ են, ուրախ եմ այդ փոփոխության համար: Կարծում եմ՝ տարբեր ոլորտներում հասարակության մտածելակերպի զարգացման մեջ արդեն իսկ զգալի ներդրում ունի ինֆլուենսերային բովանդակությունը:

-Որտե՞ղ են հատվում, և որտե՞ղ են տարանջատվում լրագրության ու ինֆլուենսեր մարքեթինգի սահմանները:

-Երկու դեպքում էլ անձը ստեղծում է բովանդակություն, սակայն զուգահեռելու շատ կետեր չեմ տեսնում: Լրագրողը աշխատում է օրվա օրակարգի թելադրանքով, ենթարկվում է խմբագրմանն ու ձևաչափի սահմանափակումներին, մինչդեռ ինֆլուենսերն ազատ է ընտրելու թեման, ոճն ու բովանդակությունը:

-Ինֆլուենսերները որքանո՞վ են հետևում լրագրողական էթիկայի սկզբունքներին:

-Ընդհանրացնելը դժվար է: Կա ինֆլուենսեր, ով ծայրաստիճան պատասխանատու կերպով մոտենում է ամեն բովանդակության, կա մյուսը, ով ստեղծում է կոնտենտ՝ առանց որևէ արժեք ու ճշգրտություն ապահովելու: Ինձ վերաբերող մասով կասեմ, որ հստակ գիտակցում եմ մեծ լսարան ունենալու պատասխանատվությունն ու յուրաքանչյուր նյութ հրապարակելուց առաջ բազմիցս ստուգում եմ այն:

Ճշգրտությունն ու անկողմնակալությունն անհամապատասխան են բոլոր ինֆլուենսերների համար: Հումորային կոնտենտ ստեղծողն ու առողջ սնվելու մասին բլոգ վարողը բոլորովին տարբեր չափանիշների առջև են կանգնած:

-Կարելի՞ է ինֆլուենսերների գործունեությունը դիտել որպես այլընտրանքային մեդիա ՀՀ-ում:

-Միանշանակ այո: Ինֆլուենսերներն ունեն լայն լսարան, մեծ ներգրավվածություն և, ամենակարևորը՝ վստահություն: Հենց այդ պատճառով է, որ բրենդները, փոխարեն հեռուստատեսությամբ կամ ռադիոյով գովազդ տեղադրելու, ավելի հաճախ ընտրում են ինֆլուենսերային համագործակցություն:

-Ինչպե՞ս են բրենդային համագործակցությունները ազդում Ձեր բովանդակության անկախության վրա:

-Ինձ ամբողջությամբ ազատ եմ համարում: Տարիների ընթացքում շատ շահավետ գովազդային առաջարկներ եմ մերժել, եթե դրանք հակասել են իմ արժեքներին: Ոչ մի քաղաքական ուժ, վնասակար սովորություններ առաջացնող արտադրանք կամ այնպիսի բժշկական ծառայություն, որից անձամբ չեմ օգտվում, երբևէ չեմ գովազդել: Վեց տարիների ընթացքում բովանդակության որակն ու փոխանցվող արժեքները միշտ առաջնայինն են եղել ֆինանսական կողմի նկատմամբ:

-Ինչպե՞ս է փոխվել լսարանի վստահությունը ավանդական մեդիայի ու ինֆլուենսերների նկատմամբ:

-Ինֆլուենսերների ազդեցությունն անկասկած մեծացել է: Ավանդական մեդիան ետ է մղվել, բայց պատճառն ինֆլուենսերները միայն չեն: Ժամանակակից մարդն այլևս չունի նախկինի ժամանակը, երբ ժամերով հեռուստատեսություն էր դիտում: Կյանքի ռիթմը փոխվել է, և, նույնիսկ ավանդական մեդիայի արտադրանք սպառելիս, մարդիկ հաճախ դա անում են սոցիալական ցանցերի միջոցով:

-Ինֆլուենսեր մարքեթինգն ինչո՞վ է ազդում հանրային կարծիքի ձևավորման վրա ՀՀ-ում:

-Ազդեցությունն արդեն ակնհայտ է: Սոցիալական ցանցերը տեղեկատվության հիմնական աղբյուրներից մեկն են, և ինֆլուենսերները հայտնվում են հենց այնտեղ, որտեղ ձևավորվում է կարծիքը: Հայաստանի դեպքում շուկայի փոքրությունն ու «բոլորը բոլորին ճանաչում են» էֆեկտը ստեղծում են ավելի ամուր կապ ինֆլուենսերի ու լսարանի միջև:

-Ինչպե՞ս եք ապահովում թափանցիկությունը գովազդային ու ոչ գովազդային բովանդակության միջև:

-Պարզապես ոչինչ չկեղծելով: Ամեն իրավիճակ ներկայացնում եմ ուղիղ այնպես, ինչպես կա:

-Ինֆլուենսերների ու լրագրության փոխգործակցությունն ինչպիսի՞ն կլինի ապագայում:

-Անկեղծ ասած, չեմ պատկերացնում, թե ի՞նչ ակտիվ համագործակցություն կարող է լինել այս երկու ոլորտների ներկայացուցիչների միջև: Ինքս ավելի քան մեկ տարի աշխատել եմ որպես վիդեոլրագրող, ծանոթ եմ երկու ոլորտներին, սակայն շատ ընդհանուր կետեր չեմ կարողանում անցկացնել: